AFFA I Liqa klublarını danışılmış oyunlara qarşı maarifləndirdi

4 noyabr 2026 — AFFA-nın Komplayns və Danışılmış Oyunlara Qarşı Mübarizə Şöbəsi I Liqada çıxış edən Şahdağ Qusar, Baku Sportinq və Xankəndi klublarının əsas komandalarının futbolçuları və məşqçiləri üçün danışılmış oyunlara qarşı maarifləndirici sessiyalar keçirib. Bu barədə Sportinfo.az məlumat yayıb.

Tədbirdə şöbənin aparıcı mütəxəssisi Murad Məmmədli iştirakçılara danışılmış oyun anlayışı, oyun zamanı futbolçuların və məşqçilərin üzləşə biləcəyi risklər və bu hallarının futbolun nüfuzuna vurduğu zərər barədə ətraflı məlumat verib. Məmmədli oyun prosesində futbolçuların və məşqçilərin rollarının qorunmasının və peşəkar davranışın vacibliyini vurğulayıb.

Sessiyada danışılmış oyunların motivləri, manipulyasiya hallarının daha çox hansı matçlarda baş verməsi və idman mərclərinin roluna dair təqdimatlar nümayiş etdirilib. Həmçinin sosial media üzərindən edilən yaxınlaşmalar, manipulyatorların istifadə etdiyi vasitələr və şəxsi profillərin düzgün idarə olunmasının əhəmiyyəti müzakirə olunub.

İştirakçılara AFFA-nın 2025-ci ildə qəbul edilmiş İntizam Məcəlləsinin müvafiq maddələri izah edilib; danışılmış oyunlarda iştirak, cəhd və ya məlumatın gizlədilməsinin ağır intizam pozuntusu olduğu bildirilib. Təlim çərçivəsində praktiki situasiyalar əsasında atılmalı addımlar və şübhəli təkliflərlə qarşılaşdıqda kiminlə və necə əlaqə saxlanmalı olduğu göstərilib.

Tədbir interaktiv suallar və yerli, beynəlxalq nümunələrin təqdimatı ilə başa çatıb. Sessiyanın əsas məqsədi futbol ictimaiyyətində şəffaflıq və dürüstlüyün qorunması, danışılmış oyunlara qarşı mübarizənin gücləndirilməsi və iştirakçıların məsuliyyət və məlumatlılıq səviyyəsinin artırılması olub.

Mənbə: Sportinfo.az

Hazırladı: GettoSport