Arsenal heyətin rəsmi fotosessiyasını yeniləyəcək

Londonun "Arsenal" klubu 2026/2027-ci il mövsümü üçün nəzərdə tutulan rəsmi komanda şəklini yenidən çəkdirmək qərarına gəlib. Buna səbəb komandanın əsas müdafiəçilərindən olan Vilyam Salibanın ilk fotosessiyada iştirak edə bilməməsidir.

Baş məşqçi Mikel Arteta "Nottingem Forest" ilə qarşılaşma öncəsi keçirilən mətbuat konfransında vəziyyəti izah edib. İspaniyalı mütəxəssisin sözlərinə görə, fransalı futbolçu həkim müayinəsində olduğu üçün çəkilişə qatıla bilməyib. Klub rəhbərliyi kommersiya öhdəlikləri səbəbindən fotosessiyanı daha çox təxirə sala bilməyib və üç cəhddən sonra ilk variantı lentə almaq məcburiyyətində qalıb.

Arteta bildirib ki, Salibanın da yer alacağı yeni bir fotosessiya təşkil olunacaq: "Qərara gəldik ki, heç olmasa həmin şəkli çəkdirək. Bəli, Salibanın da iştirakı ilə yenidən fotosessiya keçirəcəyik".

Baş məşqçi, həmçinin futbolçunun baş verənlərə anlayışla yanaşdığını vurğulayıb. Onun sözlərinə görə, Saliba komanda daxilində çox sevildiyini hiss edir və şəklə düşməməsi ilə bağlı edilən zarafatları xoş qarşılayır.

Mənbə: GettoSport