Atçılıq birinciliyində Cavid Qurbanəliyev qalib gəldi

20 oktyabr 2026 — Bakı. Azərbaycan Respublikası Atçılıq Federasiyasının təşkilatçılığı ilə keçirilən konkur üzrə Azərbaycan birinciliyində 12–16 və 17–21 yaş kateqoriyalarının qalibləri müəyyənləşib.

12–16 yaşlıların yarışında idmançılar 70–80 sm hündürlüyündə maneələri keçiblər. Birinciliyin reqlamentinə əsasən ilkin fazada idmançılar vaxt nəzərə alınmadan 6 maneəni səhvsiz adlamalı idilər; sonrakı mərhələlər həm dəqiqliyə, həm də zamana görə qiymətləndirilib. Cavid Qurbanəliyev “Burla” ləqəbli atla 24,54 saniyə göstərərək birinciliyin qalibi olub. Melissa Gedik 27,95 saniyə ilə ikinci, Nərgiz Abbaszadə 28,53 saniyə ilə üçüncü yeri tutub; hər iki idmançı “Saqamo” ləqəbli atla çıxış edib.

Finişi cərimə balı olmadan keçən idmançılar arasında ilk beşliyi Mədinə Məmmədova (“Ayla” atı) və Arzu Qəmbərova (“Patent” atı) tamamlayıblar.

17–21 yaşlıların yarışında iştirakçılar 90–100 sm hündürlüyündə maneələri adlayıblar. Bu kateqoriyada yalnız üç idmançı ilkin fazanı cəriməsiz bitirib və mükəmməl nəticə göstərən Samirə Baxşiyeva “Savalan MNM” atı ilə birinciliyi qazanıb. Əhəd Məmmədov “Nabat” atı ilə ikinci, Valeriya Roşenko “Fine Chocolate” atı ilə üçüncü olub.

Yarışın qaliblərinə kuboklar, medallar və Azərbaycan Respublikası Atçılıq Federasiyasının və Gənclər və İdman Nazirliyinin diplomları təqdim olunub.

Mənbə: GettoSport