Aydın Bayramov: Zirə üç oyunu avrokuboklar üçün oynayacaq

Zirənin qapıçısı Aydın Bayramov oktyabrın 18-də Kəpəzlə VIII tur oyununda qeydə alınan 1:1 hesablı heç-heçədən sonra komandasının məqsədlərindən və gələcək matçlardan danışıb.

Bayramov matçın maraqlı keçdiyini bildirib, Kəpəzi və azarkeşləri təbrik edib: "Belə meydança və belə azarkeş atmosferi Azərbaycanda hər zaman olmur. Doğrudan da, meydançadan və atmosferdən həzz aldıq. Maraqlı oyun keçdi. Həm onlar, həm də biz qalib gələ bilərdik." O, həmçinin hər iki tərəfin qol imkanlarından danışıb və heç-heçəni ümumi qiymətləndirmədə pis nəticə saymadığını qeyd edib.

Qapıçı növbəti qarşılaşma barədə də gözləntilərini bölüşüb: "Hər oyuna qələbə qazanmaq üçün çıxırıq. Növbəti matçımız Sumqayıtladır. Hazırlaşmaq üçün beş gün vaxtımız var. Həmin görüşdə də maksimum nəticə qazanmağa çalışacağıq."

Bayramov turnir cədvəlindəki vəziyyətə toxunaraq qarşıdakı üç oyunun önəmini vurğulayıb: "Biz maksimum yuxarı pillələr uğrunda mübarizə aparırıq. Həm yuxarıdakılara çatmaq, həm də aşağıdakılardan uzaqlaşmaq üçün qarşıdakı üç oyun bizim üçün çox böyük əhəmiyyət kəsb edir. Maksimum yuxarı pillələr üçün oynayacağıq ki, avrokuboklara düşə bilək."

Mənbə: GettoSport