Azərbaycan Güləş Federasiyası 14 regional nümayəndəlik təsis etdi

Oktyabrın 16–17-də Azərbaycan Güləş Federasiyasında (AGF) keçirilən ikigünlük görüşdə ölkənin coğrafi-iqtisadi bölgüsünə uyğun 14 regional güləş nümayəndəliklərinin yaradılması qərarı verilib. Tədbir regional güləş koordinatorlarının vəzifələri, fəaliyyət planları və inkişaf strategiyalarına həsr olunub.

Görüşün ilk günündə iştirakçılara AGF-nin struktur və strateji istiqamətləri təqdim olunub. Regionların inkişaf prioritetləri üzrə qrup işləri təşkil edilərək hər bölgənin əsas hədəfləri müəyyənləşdirilib və qarşıdakı dövr üçün fəaliyyət planları müzakirə edilib.

İkinci gün vahid təqvim planı, yarışların təşkili, onlayn məlumat bazası, sənədləşmə qaydaları və hesabatlılıq mexanizmləri ilə bağlı təqdimatlar keçirilmiş, koordinatorlar praktiki məsələlər üzrə təlimatlandırılmışlar.

Proqram çərçivəsində koordinatorlar üçnəfərlik komandalar şəklində verilən tapşırıqları yerinə yetirərək prezentasiyalar hazırlayıblar; ən yaxşı təqdimatla fərqlənən komanda xüsusi hədiyyə ilə mükafatlandırılıb. Həmçinin komandaqurucu oyunlar təşkil olunub ki, bu da iştirakçılar arasında əməkdaşlığın və ünsiyyətin gücləndirilməsinə yönəlib.

Görüşün əsas məqsədi regionlarda güləşin inkişafını sürətləndirmək, fəaliyyətin koordinasiyasını möhkəmləndirmək və idarəetmədə vahid yanaşmanı təmin etmək olub.

Mənbə: GettoSport