Azərbaycan kamandan oxatma yığması Asiya Kubokunda qızıl qazandı

Azərbaycan Kamandan Oxatma Federasiyasının (AKOF) prezidenti Anar Quliyev İraqın Süleymaniyə şəhərində keçirilmiş kamandan oxatma üzrə Asiya Kubokunun II mərhələsinin qalibləri ilə görüşərək onların nəticələrini yüksək qiymətləndirib və idmançıları təbrik edib. Bu barədə Sportinfo.az məlumat yayıb.

Görüşdə bildirilib ki, qadınlardan ibarət Azərbaycan yığması — Yaylagül Ramazanova, Fatimə Hüseynli və Lalə Əbdürəhmanova — turnirdə qızıl medal qazanıblar. Qarışıq komanda yarışlarında isə Yaylagül Ramazanova ilə Məhəmmədəli Əliyev birlikdə çıxış edərək gümüş medala layiq görülüblər.

Mətbuat açıqlamasına görə, turnirdə 19 ölkədən 120 idmançı iştirak edib. Qadınlardan ibarət komanda finalda Qazaxıstanı məğlub edərək birinciliyə yüksəlib, qarışıq komandalarda isə Azərbaycan təmsilçiləri ikinci yeri tutublar.

Anar Quliyev görüş zamanı idmançıların uğurlu çıxışlarında məşqçi heyətinin rolunu vurğulayıb və qarşıdakı beynəlxalq yarışlara, o cümlədən Yay Olimpiya Oyunlarına hazırlıq, məşq prosesinin təkmilləşdirilməsi və idmançıların peşəkar inkişafı üçün şəraitin yaradılması məsələlərinə xüsusi diqqət yetirildiyini bildirib.

Mənbə: Sportinfo.az

Hazırladı: GettoSport