Azərbaycan və Gürcüstan voleybol federasiyaları Tovuzda görüşdü

2 noyabr 2026 — Tovuz. Azərbaycan Voleybol Federasiyasının (AVF) prezidenti Şahin Bağırov və Gürcüstan Voleybol Federasiyasının (GVF) rəhbəri David Tevzadze Tovuz Olimpiya İdman Kompleksində görüşərək iki federasiya arasında əməkdaşlığın genişləndirilməsi məsələlərini müzakirə ediblər. Bu barədə Sportinfo.az məlumat yayıb.

Görüşdə AVF təmsilçiləri arasında vitse-prezidentlər Faiq Qarayev və Bəhruz Quliyev, baş katib Faiq Orucov, idman şöbəsinin direktoru Şir-Aslan Kərimov və “Turan” klubunun prezidenti Fəlah Quliyev iştirak edib. Gürcüstan tərəfdən baş katib İvane Şeklaşvili, inkişaf koordinatoru Andrey Lefçinko və milli komandanın baş məşqçisi Pata Ulumbulaşvili iştirak ediblər.

Tərəflər ölkələrində voleybolun, xüsusilə uşaq və inkişaf proqramlarının gücləndirilməsi üzrə görülən işləri müzakirə ediblər. Həmçinin 2024-cü ildə imzalanmış əməkdaşlıq memorandumunun icrası ilə bağlı fikir mübadiləsi aparılıb və gələcək birgə layihələr imkanları nəzərdən keçirilib. Federasiya rəhbərləri qarşılıqlı dəstək ifadə edərək “Turan” klubuna Çempionlar Liqasında uğurlar arzulayıblar.

Görüşdən sonra nümayəndə heyətləri “Turan”ın Çempionlar Liqasının ikinci təsnifat mərhələsində Xorvatiyanın “Mladost” komandası üzərində əldə etdiyi 3:0 hesablı qələbəni arenadan izləyiblər.

Mənbə: Sportinfo.az

Hazırladı: GettoSport