Barselona UEFA-ya müraciət etdi, PSJ-in banneri araşdırılacaq

22 oktyabr 2026 — "Barselona" oktyabrın 20-də Parisdə keçirilən Çempionlar Liqasının Liqa mərhələsi III tur oyunundan əvvəl PSJ azarkeşlərinin tribunada nümayiş etdirdiyi böyük və təhqiramiz bannerlə bağlı UEFA-ya rəsmi müraciət edib.

Park de Prensdə açılan bannerdə Texas Chainsaw filmindən ilhamlanan "Leatherface" obrazı elektrik mişarla klubun gerbini parçalayan şəkildə təsvir olunmuşdu. Həmin nümayiş "Massacre à la parisienne" yazısı və mişardan sıçrayan qığılcımları təqlid edən pirotexniki vasitələrlə müşayiət olunub.

"Barsa" rəhbərliyi hadisə zamanı stadionda olan UEFA nümayəndəsini məlumatlandıraraq bannerin məzmununa hüquqi qiymət verilməsini tələb edib və tribunadan "Puta Barça" yazılı digər plakatların da götürülməsini istəyib. Bildirilir ki, bütün bu hadisələr UEFA prezidentinin fəxri lojasında əyləşdiyi vaxt baş verib.

İspaniya mətbuatında geniş əks-səda doğuran insidentlə bağlı tanınmış şərhçi Manu Karenxo təhlükəsizlik xidmətinin belə bir banneri stadion içine necə buraxmasına təəccübünü bildirib. UEFA-nın intizam qaydaları stadionlarda zorakılığı təbliğ edən, təhqiramiz və təxribat xarakterli mesajların nümayişinə və pirotexnikadan istifadəyə görə sanksiyalar nəzərdə tutur; meydan sahibi kimi təhlükəsizlik məsuliyyəti PSJ-yə aid olduğuna görə klub barəsində intizam işi açıla bilər.

Qeyd edək ki, qarşılaşma meydan sahibləri PSJ-nin 4:2 hesablı qələbəsi ilə başa çatıb.

Mənbə: GettoSport