Dimitri Leqbo Zirəyə keçidini və adaptasiyasını izah etdi

25 oktyabr 2026 — Zirənin yeni transferi Dimitri Leqbo klubun idman direktorunun ideyalarının onu cəlb etdiyini, ölkəyə və komandaya adaptasiya prosesinin davam etdiyini bildirib. O, bu fikirləri Zirənin Sumqayıt üzərində 23 oktyabrda qazanılmış 3:2 hesablı qələbəsindən sonra səsləndirib.

Leqbo görüş barədə danışaraq qeyd edib ki, Sumqayıt qarşısında oyun çətin alınıb və rəqib yaxşı performans göstərib: "2:0-dan sonra arxayınçılıq olduğunu deməzdim. Sadəcə rəqib psixoloji üstünlüyü ələ keçirdi. Bir sayılmayan qolları da oldu. Hakimlər ofsayd qərarı verdilər. Bütün bunlara baxmayaraq, 2:2-dən sonra oyundan qopmadıq. Çalışacağıq ki, bu səhvləri bir daha təkrarlamayaq".

Futbolçu Azərbaycana gəlməzdən əvvəl uzun müddət oynamadığını, bu məqamın adaptasiyada çətinlik yaratdığını, lakin indi özünü yaxşı hiss etdiyini bildirib: "Oyundan-oyuna daha da inamlı olacam. Burada olmaqdan məmnunam."

Leqbo həmçinin keçid qərarında klubun idman direktorunun rolu və komanda daxilində tanışlıq faktından danışıb: "Bura gəlməmişdən əvvəl klubumuzun idman direktoru ilə danışmışdıq. Onun ideyaları mənim üçün cəlbedici oldu, mənə bildirdi ki, oynayacaqsan, komandaya kömək etməyə qadirsən. İndi komanda yoldaşım olan Bayere Lue də həmyerlimdir. Onunla, Sumqayıtdan Sedrik Badolo, eləcə də digər bir neçə tanıdığım futbolçu ilə söhbətimiz olmuşdu. Hamısı mənə komanda, ölkə haqda müsbət fikirlər dedilər. Bütün bunlar da qərarımı qətiləşdirməkdə kömək oldu".

Mənbə: GettoSport