Erhan Toker: Bakken Bears qarşısında nəticədən narazıyam

22 oktyabr 2026. LANDAU Lions-un baş məşqçisi Erhan Toker FIBA Avropa Kubokunun əsas mərhələsində Danimarkanın Bakken Bears komandası ilə oyunda əlavə vaxtda 88:91 hesabı ilə məğlub olduqları matçı şərh edib. Toker həm oyunçuların meydandakı çıxışından, həm də nəticədən danışıb.

Baş məşqçi deyib ki, komanda oyun planını parketə çıxarmağa çalışıb: “Matçdan əvvəl üzərində işlədiyimiz bir çox məqamı oyunçularımız parketdə göstərməyə çalışdılar. Rəqibin zəif tərəflərindən faydalanaraq onları istəmədikləri oyunu oynamağa məcbur etdik. Nəticədə, qarşılaşmanın böyük hissəsində ya hesabda öndə olduq, ya da rəqiblə bərabər səviyyədə mübarizə apardıq.”

Toker əlavə edib ki, oyunçular tapşırıqları dəqiqliklə yerinə yetiriblər, top daha çox paylaşılıb və müdafiədə kollektiv oyun olub. Buna baxmayaraq, nəticə onu razı salmayıb: “Oyunçuların performansından razı, nəticədən isə narazıyam.”

Baş məşqçi heyət problemlərinin məğlubiyyətə təsir etdiyini vurğulayıb. Freyzer və Kervin Volton cəzalı olduqları üçün komandaya kömək edə bilməyib, Gediminas Orelik isə əvvəlki zədəsi səbəbindən iştirak etməyib. Toker bildirib ki, Orelik oynasaydı əlavə vaxtda təcrübəsi ilə fərqi hiss etdirə bilərdi. O, həmçinin Ismayıl Məmmədovun komandaya böyük kömək etdiyini və Arnas Sakenisin son həftə məşqlərdə tam iştirak etdiyini qeyd edib.

Hakim qərarlarına da toxunan Toker fikrini belə izah edib: “Hakimlər hər zaman ev sahibi komandaya az da olsa üstünlük verirlər. Bu dəfə də gərgin anlarda bəzən fit onların xeyrinə səsləndi.” O, Slovakiyada və Danimarkada keçirilən hazırlıq prosesinin komandaya fayda verdiyini, bunun sanki təlim-məşq toplanışı rolunu oynadığını söyləyib və klub rəhbərliyinə təşəkkür edib.

Baş məşqçi qeyd edib ki, Bakıya qayıtdıqdan sonra komandanı əvvəlcə liqa, sonra isə yenidən FIBA Avropa Kuboku matçı gözləyir və onlar yoluna davam edəcəklər.

Mənbə: GettoSport