Həsən Zeynalov: Sabah Tovuzda bayram olacaq

19 oktyabr 2026. Turan voleybol klubunun prezidenti Həsən Zeynalov oktyabrın 20-də Tovuzda keçiriləcək Çempionlar Liqasının II təsnifat mərhələsinin ilk matçı öncəsi mətbuat konfransında komandanın hazırlığı və hədəfləri barədə danışıb.

Zeynalov toplantıda komandanın yaxşı hazırlaşdığını vurğulayıb və “Sabah Tovuz və Azərbaycan voleybolu üçün böyük bayram olacaq. Hazırlığımız və həyəcanımız yüksək səviyyədədir. Oyuna qədər bir məşqimiz olacaq. İnanırıq ki, vəzifəmizin öhdəsindən gələcəyik,” deyə bildirib.

Klub rəhbəri həmçinin transfer siyasətindən danışıb: “Transfer məsələləri ilə baş məşqçimiz Ziya Rəcəbov məşğul olub. Sadəcə, böyük klublar transferlər həyata keçirirlər. Biz isə daha çox azad agentlərə üstünlük veririk. Mən azarkeş kimi görülən işlərdən razıyam.”

Zeynalov Turanın əsas hədəfini qrup mərhələsinə və daha sonra növbəti mərhələlərə yüksəlmək kimi təqdim edib.

Qeyd edək ki, Turan ilə Xorvatiyanın Mladost-Zaqreb komandası arasındakı görüş oktyabrın 20-də saat 19:00-da Tovuzda keçiriləcək.

Mənbə: GettoSport