İker Kasilyas məhkəmədə əlavə tibbi-hüquqi ekspertiza tələb etdi

14 oktyabr 2026 — Portuqaliyada İker Kasilyasın 1 may 2019-cu il məşq zamanı keçirdiyi infarktla bağlı məhkəmə prosesi davam edib. Məhkəmə Tibbi-Hüquqi Şuradan hadisənin səbəbləri ilə bağlı əlavə izahat və ekspertiza tələb edib.

Prosesdə təqdim olunan məhkəmə materiallarında kardioloqlar arasında fərqli rəy olduğu göstərilib. Kasilyasa tibbi yardım göstərən həkim İzabel Kelyaşın fikrincə, məşq zamanı ürək damarındakı aterosklerotik lövhənin qopması infarktın səbəbi olub. Digər mütəxəssislər isə sabiq qapıçının əvvəlcədən mövcud ürək-damar xəstəliyini əsas səbəb sayaraq, adi fiziki məşqin infarkta birbaşa səbəb olmadığını bildiriblər.

Məhkəmə qarşısındakı əsas məsələ fiziki yüklənmənin infarktı törədən amil olub-olmadığını və hadisənin əmək fəaliyyəti ilə hüquqi əlaqəsinin müəyyənləşdirilməsidir.

İker Kasilyas sığorta şirkəti Fidelidade-dən müvəqqəti əmək qabiliyyətini itirməsinə görə 750 821 avro, daimi əmək qabiliyyətsizliyinə görə isə 1 521 780 avro təzminat tələb edir. Bundan əlavə, sabiq futbolçu klubun da sığortanın əhatə etmədiyi ödənişlərə görə məsuliyyət daşıdığını iddia edir.

Qeyd olunur ki, hadisə 2019-cu il mayın 1-də Portu klubunun məşqi zamanı baş verib; həmin insidentdən sonra Kasilyas yaşıl meydanlara qayıtmayaraq 2020-ci ildə peşəkar karyerasını bitirib.

Mənbə: GettoSport