İoannis Diamantakos Azərbaycanda qadın basketbolunu gücləndirir

21 oktyabr 2026 — Azərbaycan qadın basketbolu üzrə milli komandaların baş məşqçisi və bütün yaş qruplarının koordinatoru İoannis Diamantakos ölkədə uzunmüddətli inkişaf proqramı həyata keçirildiyini bildirib.

Yunan mütəxəssis SEPK-nın saytına verdiyi müsahibədə əsas hədəfin aşağı yaş qruplarından başlayaraq güclü milli komandalar formalaşdırmaq olduğunu vurğulayıb. Diamantakosun sözlərinə görə, proqramın konkret məqsədlərindən biri indiki U-14 komandasının qarşıdakı beş il ərzində daha yüksək səviyyəyə çatması və gələcəkdə B divizionundan yüksəlməsidir: “Əsas məqsəd indiki U-14 milli komandasının qarşıdakı beş il ərzində Azərbaycanı daha yüksək səviyyədə təmsil edə bilməsidir. Son hədəf isə B divizionundan yüksəlməkdir. Bu, səbr və sistemli iş tələb edən uzunmüddətli məqsəddir.”

Diamantakos proqramın yalnız milli komandalarla məhdudlaşmadığını, qadınlararası daha sabit və rəqabətli ölkə çempionatının yaradılması, klubların gələcəkdə Avropa turnirlərində iştirakı və 3x3 basketbolunun inkişafının da planlaşdırıldığını bildirib. Hazırda U-14, U-16, U-18 və U-20 komandalarının gündəlik məşqlərinin təşkil olunduğu, federasiyanın daha kiçik yaşlı basketbolçulara da diqqət ayırdığı qeyd olunub.

Baş məşqçi Azərbaycanda maliyyə və təşkilati imkanların mövcud olduğunu, əsas məsələnin düzgün planlaşdırma və ardıcıllıq olduğunu vurğulayıb: “Burada əhəmiyyətli iş görmək üçün lazımi şərait, istək və maliyyə potensialı var. Əsas məsələ düzgün planlaşdırma aparmaq və mövcud imkanları real irəliləyişə çevirməkdir.”

Mənbə: GettoSport