İqor Ponomaryov Sabahın ÇL-dəki çıxışını şərh etdi

Sabah klubunun Müşahidə Şurasının üzvü İqor Ponomaryov UEFA Çempionlar Liqasının əsas mərhələsinin üçüncü turunda Dortmund Borussiyasına 1:2 hesabı ilə uduzduqları qarşılaşma barədə fikirlərini bölüşüb. Klub rəsmisi komandanın Almaniya nəhənginə qarşı layiqli oyun nümayiş etdirdiyini bildirib.

Ponomaryov ikinci hissənin startında buraxılan qolun təəssüf doğurduğunu vurğulayıb:

“Futbolçularımız Borussiya kimi güclü komandaya qarşı layiqli mübarizə apardılar. Təəssüf ki, ikinci hissənin əvvəlində qarşısını almaq mümkün olan qol buraxdıq. Bundan sonra da qol imkanlarımız oldu. İkinci hissənin sonlarına yaxın futbolçumuz qapıçı ilə təkbətək vəziyyətə çıxdı. Borussiyanın haqqını vermək lazımdır, çox yaxşı komandadır. Amma bizim futbolçular da pis oyun keçirmədilər”.

Klub rəsmisi Çempionlar Liqasında toplanan təcrübənin komandaya növbəti matçlarda fayda verəcəyini qeyd edib. O, hər görüşün oyunçular üçün böyük sınaq olduğunu və həm daxili çempionatda, həm də qitəmiqyaslı turnirlərdə onlara əlavə stimul qazandıracağını deyib. Ponomaryov futbolçuların böyük rəqiblərdən elə də geri qalmadığını bildirərək, növbəti rəqibin Barselona olmasına baxmayaraq, gələcək oyunlarda da layiqli çıxış etmək şansının olduğunu diqqətə çatdırıb.

Mənbə: GettoSport