KJ Simpson Jr Basketbol Çempionlar Liqasında ən yaxşı seçildi

Qalatasarayın basketbolçusu KJ Simpson Jr. Basketbol Çempionlar Liqasında mövsümün üçüncü həftəsinin ən yaxşı oyunçusu adına layiq görülüb. 24 yaşlı amerikalı müdafiəçi azarkeşlər arasında keçirilən 24 saatlıq səsvermə nəticəsində bu mükafatı qazanıb.

Karyerasında ilk dəfə Avropada çıxış edən basketbolçu turnirdəki debüt oyununda uğurlu çıxışı ilə diqqət çəkib. Ehtiyatdan meydana daxil olaraq 26 dəqiqə parketdə qalan Simpson 17 xal, 8 ribaund və 3 assistlə yadda qalıb. O, 10 cəhddən 5-ni, o cümlədən 4 üçlük cəhdindən 3-nü dəqiq yerinə yetirib.

Bu qələbə həm də komandanın baş məşqçisi Manuchar Markoişvilinin rəhbərliyi altında əldə etdiyi ilk uğur olub. Hazırda B qrupunda mübarizə aparan İstanbul təmsilçisi 1 qələbə və 1 məğlubiyyətlə qrupdakı mövqeyini qoruyur. Komanda növbəti matçını noyabrın 4-də səfərdə Polşanın Legia Varşava klubuna qarşı keçirəcək.

Xatırladaq ki, KJ Simpson Jr. 2024–2026-cı illər aralığında NBA-də Şarlott Hornets və Denver Naqgets komandalarının heyətində 56 oyuna çıxıb.

Mənbə: GettoSport