Muxtorxon Taşxocayev Azərbaycan MPK-nı 30 illik yubileyi münasibətilə təbrik etdi

22 oktyabr 2026 — Özbəkistan Milli Paralimpiya Komitəsinin sədri Muxtorxon Taşxocayev Azərbaycan Milli Paralimpiya Komitəsini (MPK) qurumun 30 illik yubileyi münasibətilə təbrik edib.

Taşxocayev təbrik məktubunda qeyd edib ki, Azərbaycan MPK ötən illər ərzində paralimpiya hərəkatının möhkəmləndirilməsinə və əlilliyi olan şəxslər üçün yeni imkanların yaradılmasına əhəmiyyətli töhfələr verib. O, həmçinin ölkələr arasındakı dostluq, qardaşlıq və qarşılıqlı hörmət münasibətlərini vurğulayıb.

Özbəkistan komitəsinin sədri bildirib ki, Azərbaycan idmançılarının əldə etdiyi uğurlar Özbəkistanda da böyük sevinclə qarşılanır və paralimpiyaçıların qələbələri insanların inamını artıran və onlara həyat çətinliklərini aşa bilmə ruhu verən vacib amildir.

Taşxocayev məktubunda Azərbaycan MPK rəhbərliyinə, idmançılara, məşqçilərə və bütün paralimpiya ailəsinə möhkəm cansağlığı, firavanlıq, tükənməz enerji və yeni nailiyyətlər arzulayıb. O, gələcək qələbələrin yeni imkanlar yaradacağına və növbəti nəsillər üçün ilham mənbəyi olacağına ümid etdiyini bildirib.

Mənbə: GettoSport