Sabah Çempionlar Liqasında layiq olduğunu göstərdi

18 oktyabr 2026 — "Sabah"ın müdafiəçisi Rəhman Daşdəmirov Çempionlar Liqasının liqa mərhələsində evdə "Slaviya" üzərində qazanılan qələbədən sonra komandasının çıxışı və gələcək hədəfləri barədə danışıb.

Daşdəmirov qələbədən sonra jurnalistlərə verdiyi açıqlamada həm şəxsi, həm də komanda səviyyəsində məmnunluğunu ifadə edib: “Hamınızı təbrik edirəm! Bu qələbəyə görə çox xoşbəxtəm. İlk ev oyunumuzda belə bir nəticə əldə etmək qürurvericidir. Komandamızla, baş məşqçimizlə və bütün komanda yoldaşlarımla fəxr edirəm. Bu hissləri sözlə ifadə etmək çətindir”.

Müdafiəçi rəqibin çıxışını da yüksək qiymətləndirib və oyunun çətin keçdiyini vurğulayıb: “Slaviya güclü rəqib idi. Onların da real qol imkanları oldu. Şükürlər olsun ki, sonda qalib gələn tərəf biz oldu”.

Daşdəmirov əlavə edib ki, "Sabah" Çempionlar Liqasında layiq olduğunu göstərib və komandası qarşıdakı görüşlərdə maksimum xal toplamağı hədəfləyir: “Düşünürəm ki, ‘Sabah’ Çempionlar Liqasında mübarizə aparmağa layiq olduğunu göstərdi. Biz də ən yaxşı nəticələrə layiqik. Qarşıdakı oyunlarda maksimum xal toplamağa və xalqımızı sevindirməyə çalışacağıq. Qələbə qazanmaq bizə əlavə motivasiya verir”.

Futbolçu ev oyunlarında da qələbə qazanmaq istədiklərini bir daha vurğulayıb: “Qarşıdakı ev oyunlarının hər birində qələbə qazanmaq istəyirik. Ümid edirəm ki, bunu bacaracağıq”.

Mənbə: GettoSport