Spalletti Yuventusun Latsio məğlubiyyətini sərt tənqid etdi

19 oktyabr 2026 — Luçano Spalletti A Seriyasının yeddinci turunda Latsioya 0:3 hesablı məğlubiyyətdən sonra Yuventusun çıxışını kəskin tənqid edib. Baş məşqçi Turinin komandasının oyunda rəqibdən bütün komponentlərdə geri qaldığını etiraf edib.

Spalletti "Bu, şübhəsiz ki, zəif Yuventus idi. Komanda oyuna nəzarət edə bilmirdi və hücumları necə qurmaq barədə heç bir ideyası yox idi. Bunu hətta özümüzə izah etmək çətindir" sözlərini səsləndirib. O, həmçinin matçın özü üçün də gözlənilməz olduğunu vurğulayıb: "Bu oyun məni də təəccübləndirdi. Ona görə ciddi düşünməliyəm."

Baş məşqçi UEFA Avropa Liqasında Selta Viqo ilə qarşılaşmadan sonra komandanın bərpası üzərində işləndiyini xatırladıb: "Cümə günü səhər saat dörddə Viqodan qayıtdıq. Bundan sonra fiziki hazırlıq üzrə mütəxəssislər futbolçuların bərpası ilə məşğul oldular. Heyətdə altı dəyişiklik etdik, lakin həm fiziki, həm də düşüncə baxımından ləng idik."

Qeyd olunur ki, Spalletti fabio Pizakane ilə mübahisəyə görə aldığı cəza səbəbindən Latsio ilə görüşdə texniki zonada yer almayıb. Oyunun sonunda tribunalar da sərt reaksiya göstərib və azarkeşlər final fitindən sonra komandanı fitə basıblar.

Yeddinci turdan sonra Yuventus 11 xal toplayıb və A Seriyasının liderindən səkkiz xal geri qalır. Spalletti komandası ilə münasibətlərini və ünsiyyət tərzini yenidən təhlil edə biləcəyini bildirib: "Bəlkə də komanda ilə münasibətlərimi yenidən təhlil etməliyəm. Əminəm ki, futbolçular özləri də bugünkü çıxışın qənaətbəxş olmadığını anlayırlar."

Mənbə: GettoSport