Sumqayıt Araz-Naxçıvan qarşısında vacib qələbə qazandı

16 oktyabr 2026 — Misli Premyer Liqasının 8-ci turunda Sumqayıt Araz-Naxçıvanı 2:1 hesabı ilə məğlub edərək mühüm qələbə əldə edib.

Matçdan sonra mətbuat konfransında çıxış edən baş məşqçi Filipe Kandido komandasının performansını yüksək qiymətləndirib və fasilədən sonra edilən dəyişikliklərin oyuna təsir etdiyini bildirib. O, görüşün əvvəlində planlaşdırılmamış çətinliklərlə üzləşdiklərini, rəqibin mərkəzdə dörd futbolçu ilə çıxış etməsinin onları təəccübləndirdiyini vurğulayıb: "Düzdür, matça istədiyimiz kimi başlamadıq. Rəqib bizə sürpriz hazırlamışdı, mərkəzdə 4 nəfər olacaqlarını gözləmirdik. Müəyyən rahatlıq var idi, çoxlu top itirirdik. Sanki buraxdığımız qoldan sonra ayıldıq. Fasilədə müdafiədə dəyişikliklər etdik və ikinci hissədə çox yaxşı oynadıq. Bu qədər qol imkanı yaratdığımız üçün qələbəyə layiq idik."

Kandido komandanın qələbə qolunu vuran gənc hücumçu Nihad Əhmədzadənin çıxışını da şərh edib: "Nihad gəncdir, uşaqdır. Mübarizə aparmaq istəyir və daha yaxşı futbolçu olmaq arzusundadır. Bəzən meydanda ağıllı qərarlar verir. Sonda qələbə qolunu vurduğu üçün xoşbəxtik. Amma onun üzərində hələ çox işləmək lazımdır. Qarşıda oynamaq üçün böyük vaxtı var, lakin hər dəfə meydana çıxmağa layiq olduğunu sübut etməlidir."

Baş məşqçi növbəti turdakı Zirə matçına da toxunub. Kandido rəqibin heyətini keyfiyyətli adlandırsa da, öz prinsipinə sadiq qalaraq yalnız növbəti oyuna fokuslandığını vurğulayıb və 6 ildir üstələyə bilmədikləri statistikasından xəbərsiz olduğunu, bəlkə də bunu futbolçuları motivasiya etmək üçün istifadə edəcəyini söyləyib.

Mənbə: GettoSport