Tahir Baxşıyev NTD-nin məğlubiyyətini sərt qiymətləndirdi

10 oktyabr 2026 — Azərbaycan Basketbol Liqasının ikinci turunda NTD klubu LANDAU Lions-a 68:102 hesabı ilə uduzub. Oyun sonrası NTD-nin baş məşqçisi Tahir Baxşıyev matçı və komandanın çıxışını kəskin tənqid edib.

Baxşıyev nəticədən daha çox oyun səviyyəsindən narazı olduğunu vurğulayıb: “Biz çox pis oynadıq. Məsələ böyük hesabla uduzmağımızda deyil, oyunumuzun özü çox zəif idi”.

Baş məşqçi həm kollektiv, həm də fərdi performanslara münasibət bildirərək gələcəkdə ciddi çalışmağın vacibliyini qeyd edib. O, müəyyən oyunçuların çıxışının qənaətbəxş olmadığını xüsusi vurğulayıb: “Mən heç vaxt oyunçulardan kimisə ayrıca qeyd etməyi sevmirəm. Amma bu gün Məhəmməd Hüseynli çox zəif oynadı. Əvvəlki matçda əla çıxış etmiş, 30 xal toplamışdı. Bu gün isə oyunu alınmadı.”

Baxşıyev əlavə edib ki, mövsümün əvvəlindən komandaya çox iş düşür və hər görüş oyunçular üçün dəyərli təcrübədir: “Bu mövsüm bizi çox işin gözlədiyini bilirdik. Oyunçular da bunu başa düşməlidirlər. Hər oyun onlar üçün böyük təcrübə və dəyərli dərsdir. İnkişaf etmək üçün hələ çox çalışmalıyıq. Oyunçular da bunu anlayacaqlar. Buna əminəm”.