Valdas Dambrauskas Sabah klubunun Çempionlar Liqası hədəflərini açıqladı

“Sabah” futbol komandasının baş məşqçisi Valdas Dambrauskas UEFA Çempionlar Liqasındakı tarixi debüt, qarşıdakı oyunlar və komandanın hədəfləri barədə “Arab News” nəşrinə müsahibə verib. Litvalı mütəxəssis Avropanın ən nüfuzlu klub turnirində iştirakın klub üçün böyük uğur olduğunu bildirib.

Onun sözlərinə görə, komanda əvvəllər avrokuboklarda heç vaxt iki mərhələdən artıq keçməmişdi, lakin indi dörd təsnifat mərhələsini adlayaraq Çempionlar Liqasına vəsiqə qazanıb: “Əlbəttə, klubun brendini inkişaf etdirmək, tanınmaq, daha yaxşı futbol oynamaq və nəticələr qazanmaq istəyirik. Lakin bundan sonra əldə edəcəyimiz hər şey əlavə uğurdur”. Baş məşqçi püşkatmanın Azərbaycan çempionu üçün əlverişli olmadığını və dünyanın ən güclü komandaları ilə qarşılaşacaqlarını etiraf edib.

Dambrauskas ilk turda İngiltərənin “Mançester Yunayted” klubuna 0:4 hesablı məğlubiyyətin səbəblərinə toxunaraq futbolçuların rəqibin gücündən qorxmadığını, lakin taktiki səhvlərə yol verdiklərini qeyd edib. Mütəxəssis komandanın qarşıdakı səfərlərdə qət edəcəyi məsafəyə də xüsusi diqqət çəkib: “Bildiyimə görə, bu mövsüm Avropada ən uzun məsafə qət edəcək komanda bizik. Hesablamalara əsasən, dörd səfər oyunu üçün 17 min kilometr yol getməliyik. Geri dönüşlə birlikdə bu, 34 min kilometr edir. Yer kürəsinin çevrəsinin təxminən 40 min kilometr olduğunu nəzərə alsaq, demək olar ki, dünya ətrafında dövrə vuracağıq”.

Baş məşqçi “Sabah”ın “Qarabağ”dan sonra Çempionlar Liqasının əsas mərhələsinə yüksələn ikinci Azərbaycan klubu olmasını tarixi nailiyyət adlandırıb. Avqustun 25-də Çempionlar Liqasına vəsiqə qazananda klubun hələ səkkiz yaşı olduğunu xatırladan baş məşqçi ardıcıl iki ildə iki Azərbaycan klubunun bu mərhələyə yüksəlməsinin ölkə futbolunun potensialını göstərdiyini vurğulayıb.

Mənbə: GettoSport