Vasif Haqverdiyev beş oyunluq cəzalandı — AFFA qərarı

23 oktyabr 2026. AFFA İntizam Komitəsi U-17 Liqasında çıxış edən “Şəfa”nın baş məşqçisi Vasif Haqverdiyevi beş oyunluq cəzalandırıb.

Komitənin qərarına görə, Vasif Haqverdiyev “İmişli” ilə matçdan sonra öz oyunçusuna qarşı təcavüzkar davranışa görə qırmızı vərəqə alıb və növbəti beş oyunda texniki zonada yer ala bilməyəcək.

İkinci Liqada da bir neçə cəza tətbiq olunub. “Dinamo”nun futbolçusu Valeh Seyidov səkkizinci turda “Qaradağ Lökbatan”la oyunun 70-ci dəqiqəsində təcavüzkar davranışa görə dörd oyunluq diskvalifikasiya edilib, həmçinin klub 300 manat cərimə olunub.

“Ağdaş” komandasının rəhbəri Ruslan Hüseynov “Hypers”lə oyundan sonra hakimləri təhqir etdiyi üçün növbəti dörd matça buraxılmayacaq; klub 1000 manat cərimə ödəməlidir.

“Şəmkir”in oyunçusu Elçin Qasımov isə “Difai” ilə qarşılaşmada təcavüzkar davranışa görə üç oyunluq cəzaya məruz qalıb və klub 300 manat cərimələnib.

Mənbə: GettoSport