Williams 2027 bolidinə FW50 adını verdi və yubiley tədbirlərini açıqladı

Williams 2027 üçün bolidini FW50 adlandırdığını açıqlayıb, Londonda W50 Live sərgisi və ev yarışında azarkeş seçimi kimi 50 illik yubiley planlarını təqdim…

GettoSport redaksiyası•12:50 · 32 dəqiqə əvvəl•1 dəq oxu

Paylaş

Oxundu Sonra oxu

Williams FW50 bolidi və W50 Live sərgi loqosu ilə nümayiş — Foto: Kokpit.az

17 oktyabr 2026 — Williams komandası 2027-ci il üçün hazırlanacaq bolidin adını FW50 elan edib və komandanın 50 illik yubileyi çərçivəsində keçiriləcək tədbirlərin ilkin detalları ilə çıxış edib. Əlamətdar tədbirlərdən biri Londonda, Leake Street küçəsi 26 ünvanında təşkil olunacaq W50 Live azarkeş sərgisidir.

Sərgidə Williams tarixində iz qoymuş bir neçə məşhur bolid nümayiş olunacaq: komandanın 1977-ci ildə yarışdığı ilk F1 avtomobili FW06, 1987-ci ildə çempionluq gətirən FW11B, 1992 mövsümünə damğa vuran FW14B və Jak Vilnövün çempion olduğu FW19. Həmçinin həm yaxın dövrlərdə istifadə edilən avtomobillər, həm də FW50 nümayiş bolidi sərgi məkanında yer alacaq.

Williams Britaniya Qran-prisindən əvvəl ev yarışında istifadə olunacaq xüsusi dizaynın seçilməsində azarkeşlərin iştirakı üçün imkan yaradacağını da bildirib.

Komandanın rəhbəri Ceyms Vovlz yubiley münasibətilə bunları deyib: “Frenk Vilyamsın avtoidmanın ən güclü komandalarına qarşı mübarizə aparmaq və qalib gəlmək əzmi ilə bu komandanı, demək olar ki, sıfırdan qurmasından bəri 100-dən çox Formula 1 komandasının gəlib-getdiyini düşünmək inanılmazdır. Müstəqillik, ehtiras və qazanmaq üçün tükənməyən istəyimiz 50-ci ilimizə qədəm qoyarkən də genimizin bir hissəsi olaraq qalır. Yubiley tədbirlərimiz vasitəsilə Williams-ın irsini formalaşdıran qəhrəmanları və hekayələri yeni nəsil azarkeşlərlə bir araya gətirəcəyik. Məhz bu azarkeşlər daha böyük uğurlara imza atmağımız üçün bizi gələcəyə aparacaqlar.”

Formula 1-in baş direktoru Stefano Domenikali isə komandaya təbrik göndərərək Williams-ın idmandakı 50 illiyini yüksək qiymətləndirib: “Williams yalnız tariximizin mühüm bir hissəsi deyil, həm də Formula 1-in kimliyinin ayrılmaz elementidir. Komandanın uğurları, xatirələri və unudulmaz anları idmanımızda həmişə xüsusi yer tutacaq”.

Qeyd edək ki, açıqlamada Ferrari və McLaren-dən sonra Williams-ın Formula 1-də 50 illiyini qeyd edən üçüncü komanda olacağı vurğulanıb.