Yuri Vernidub: Son iki matçda 4 xal itirmişik

17 oktyabr 2026 — Misli Premyer Liqasının 7-ci turunda Qarabağla səfərdə 3:3 hesablı bərabərə qalan Neftçi-nin baş məşqçisi Yuri Vernidub oyundan sonra mətbuat konfransında jurnalistlərin suallarını cavablandırıb.

Vernidub qələbəni əldən verdiklərinə görə təəssüfləndiyini bildirib: "Bu, idmandır, futboldur. Bəzi hallarda olur ki, 0:3 olur, sonra 3:3, ya da 4:3 uduzursan. Əsas odur ki, nəticə çıxarmaq lazımdır. Derbidir. Burada heç kim uduzmaq istəmir. Əlbəttə ki, bu, bizə heç nə bonus vermir. Mütləq qələbə qazanmaq lazım idi."

Baş məşqçi son iki oyunda itkilərə də diqqət çəkib: "Səmimi deyirəm ki, bəli. Son 2 oyunda 4 xal itirdik. Xüsusilə də, bu gün." Vernidub həmçinin çempionatın 1/4 hissəsinin geridə qaldığını xatırladıb və qarşıda 25 oyunun dayandığını vurğulayıb: "Kim ən doğru yolla davam etsə, qələbə də onun olacaq."

Rotasiya və oyun quruluşu barədə suallara cavab olaraq o, səbirli və təmkinli yanaşmağın vacibliyini bildirib: "Ola bilər ki, 40 dəqiqə ərzində nəzəriyyədən danışırıq... futbol şahmat kimidir. Topu qabağa vurmaqla bitmir. Necə oyun qurmaq lazım olduğunu bilməliyik."

Qapıçılarla bağlı sual zamanı Vernidub hər iki klub qapıçısının səhvlərini ümumi futbolla əlaqələndirib və komandasının qapıçı siyasətini müdafiə edib: "Bizim iki güclü azərbaycanlı qapıçımız var. Emil Balayevin 38 dərəcə hərarəti var idi. Oyuna Rza Cəfərov çıxdı. Səhvlər ola bilər... Azərbaycanlılar var ki, onların üzərində işləmək, daha inkişaf etdirmək daha faydalıdır, nəinki kənardan gətirək."

Mənbə: GettoSport