Zəfər turniri İstanbulda 62 qolfçu iştirak etdi

Oktyabrın 9-11-də Türkiyənin İstanbul şəhərində, Kemer Qolf Klubunda Azərbaycan və Türkiyə qolfçularının iştirakı ilə "Zəfər" turniri keçirilib. Yarışda iki ölkədən ümumilikdə 62 idmançı qatılıb.

Turnir Türkiyə Qolf Federasiyası və Azərbaycan Qolf Federasiyasının birgə təşkilatçılığı ilə baş tutub. Tədbir çərçivəsində açılış mərasimi keçirilib.

Açılış mərasimində Türkiyə Qolf Federasiyasının prezidenti Yıldırım Dəmirörən və Azərbaycan Qolf Federasiyasının prezidenti Rauf Xəlilov çıxış ediblər. Hər iki federasiya rəhbəri idman vasitəsilə Azərbaycan və Türkiyə arasında dostluq və qardaşlıq əlaqələrinin gücləndiyini vurğulayıb.

Qeyd edilir ki, "Zəfər" turnirinin əvvəlki mərhələsi 2025-ci ildə Bakıda, Dreamland Qolf Klubunda təşkil olunub və orada Azərbaycan və Türkiyədən ümumilikdə 55 qolfçu iştirak etmişdi.

Mənbə: GettoSport