2028-ci il Amerika Kuboku yenidən ABŞ-də təşkil oluna bilər

2028-ci ildə keçiriləcək Amerika Kubokunun ev sahibliyinin yenidən Amerika Birləşmiş Ştatlarına həvalə edilməsi gündəmdədir. "The Times" qəzetinin yaydığı məlumata görə, turnirin məhz bu ölkədə baş tutması üçün hazırlıqlar aparılır.

Əgər qərar təsdiqlənərsə, ABŞ 2016 və 2024-cü illərdən sonra 12 il ərzində üçüncü dəfə bu nüfuzlu yarışa ev sahibliyi edəcək. Argentina və Ekvadorun artıq namizədlər siyahısından kənarlaşdırıldığı bildirilir. Hazırda CONMEBOL və CONCACAF komandalarının iştirakı ilə 20 komandalı formatın tətbiqi ətrafında müzakirələr davam edir.

Turnirin təqvimi ilə bağlı bəzi çətinliklər mövcuddur. Həmin il Los-Ancelesdə Yay Olimpiya Oyunlarının keçiriləcəyi nəzərə alınaraq, dəqiq tarix hələlik razılaşdırılmayıb. Həmçinin, Olimpiada ilə əlaqədar Los-Anceles şəhərinin Amerika Kubokuna ev sahibliyi edəcək məkanlar siyahısından çıxarılması ehtimalı var. CONMEBOL rəsmiləri məsələ ilə bağlı hələlik rəsmi açıqlama verməyib.