AMADA dörd federasiyanın idmançıları üçün seminar keçirdi

Azərbaycan Milli Antidopinq Agentliyi (AMADA) tərəfindən dörd idman federasiyasının təmsilçiləri üçün maarifləndirici seminarlar təşkil olunub. Tədbir ölkədə antidopinq sahəsində biliklərin artırılması məqsədi daşıyır. Bu barədə Sportinfo.az məlumat yayıb.

Təlimlərə Azərbaycan Güləş Federasiyası, Azərbaycan Taekvondo Federasiyası, Azərbaycan Qılıncoynatma Federasiyası və Azərbaycan Üzgüçülük Federasiyasının idmançıları cəlb ediliblər.

Seminarlar zamanı iştirakçılara qadağan olunmuş maddələrin siyahısı, dopinq nəzarəti prosedurları, həmçinin idmançıların hüquq və öhdəlikləri barədə ətraflı məlumat verilib. Bununla yanaşı, 2027-ci il yanvarın 1-dən qüvvəyə minəcək yeni Ümumdünya Antidopinq Məcəlləsində nəzərdə tutulan əsas dəyişikliklər izah edilib.

İnteraktiv formatda keçən təlimlərdə idmançıların sualları cavablandırılıb və antidopinq qaydalarının pozulması ilə bağlı risklər müzakirə olunub. Seminarların əsas məqsədi dopinqdən istifadənin qarşısını almaq və idmanda ədalətli rəqabət prinsiplərini təşviq etməkdir.

Mənbə: Sportinfo.az

Hazırladı: GettoSport