Arseniy Djioyev Astanada dünya gümüşü qazandı

1 noyabr 2026 — Astanada keçirilən güləş üzrə dünya çempionatında Azərbaycan millisinin üzvü Arseniy Djioyev 86 kq çəki dərəcəsində gümüş medal qazanıb. Final görüşündə ABŞ təmsilçisi Kayl Deykə məğlub olan idmançı yarışdan sonra fikirlərini bölüşüb. Bu barədə Offsideplus.az məlumat yayıb.

Djioyev matçdan sonra qazandığı mükafata və göstərilən dəstəyə görə minnətdarlıq edib, əzmkarlıqla çalışmağa davam edəcəyini vurğulayıb. O, qızıl medal arzusuna baxmayaraq, hələ zamanın olduğunu və inkişaf etdiklərini söyləyib.

"Çox sağ olun, təbriklər üçün təşəkkür edirəm. Çox istəsəm də, Azərbaycan bayrağının ən yüksəkdə dalğalanmasını arzulasam da, qızıl medala yiyələnə bilmədim. Lakin hələ zamanımız var və doğru istiqamətdə irəliləyirik, inkişaf var. Bu, yalnız başlanğıcdır. Növbəti dəfə fəxri kürsünün ən yüksək pilləsində dayanmağa çalışacam".

O, həmçinin finaldakı məğlubiyyəti və yarışboyu göstərilən dəstəyi şərh edib: "Güləşdə öncədən prognoz vermək çox çətindir. Ola bilsin ki, rəqibim bu dəfə əvvəlkindən daha yaxşı hazırlaşmışdı, yaxud mən səhvlərə yol verdim. Hələ bu barədə düşünməyə vaxtım olmayıb, məşqçilər korpusu ilə matçı analiz edib doğru nəticələr çıxaracağıq."

Djioyev Azərbaycana, Güləş Federasiyasına, Gənclər və İdman Nazirliyinə və məşqçilərinə yaradılan şərait və dəstəyə görə təşəkkürünü bildirib və gələcək yarışlara nikbin yanaşdığını vurğulayıb.

Mənbə: Offsideplus.az

Hazırladı: GettoSport