Azərbaycan güləş millisi Astanaya 23 idmançı ilə yollanır

20 oktyabr 2026. Oktyabrın 24-dən noyabrın 1-dək Qazaxıstanın paytaxtı Astanada keçiriləcək dünya çempionatı üçün Azərbaycan güləş millilərinin heyəti açıqlanıb.

Təlim-məşq bazasında yunan-Roma güləşi üzrə milli komandanın yolasalma mərasimi keçirilib. Tədbirdə gənclər və idman naziri Fərid Qayıbov, AGF-nin vitse-prezidentləri Namiq Abdullayev və Fərid Mansurov, həmçinin AGF-nin baş katibi Pərvin Piriyev iştirak edib və milliyə uğurlar arzulayıblar.

Oktyabrın 20-də Quba Olimpiya İdman Kompleksində isə sərbəst güləş üzrə milli komandanın üzvləri ilə görüş keçirilib. Görüşdə Namiq Abdullayev, Fərid Mansurov və Pərvin Piriyev iştirak edərək komandaya uğurlar arzulayıblar.

Heyət və məşqçilər

Mundialda Azərbaycanı ümumilikdə 23 güləşçi təmsil edəcək. Yarışın ilk günlərində yunan-Roma güləşi üzrə komandamız çıxış edəcək. Bu komandanın heyəti və rəhbərliyi belədir:

• Baş məşqçi: Məhəmməd Bəna; böyük məşqçi: Nurəddin Rəcəbov; məşqçilər: Rövşən Bayramov, Sabah Şəriəti, Rəsul Cəzini, Bəhruz Həzrətipur
• Eldəniz Əzizli (55 kq), Murad Məmmədov (60 kq), Nihat Məmmədli (63 kq), Həsrət Cəfərov (67 kq), Ülvü Qənizadə (72 kq), Sənan Süleymanov (77 kq), Qurban Qurbanov (82 kq), İslam Abbasov (87 kq), Murad Əhmədiyev (97 kq), Sərxan Məmmədov (130 kq)

Daha sonra qadınlar komandası mübarizəyə qoşulacaq. Qadın güləşi üzrə heyət və məşqçi heyəti belədir: baş məşqçi əvəzi Toğrul Əsgərov, böyük məşqçi Ağahüseyn Mustafayev; Jalə Əliyeva (57 kq), Ruzanna Məmmədova (59 kq), Birgül Soltanova (65 kq).

Çempionatın son günlərində sərbəst güləşçilərimiz xalçaya çıxacaq. Sərbəst güləş üzrə heyət və rəhbərlik:

• Baş məşqçi: Xetaq Qazyumov; böyük məşqçi: Cəbrayıl Həsənov; məşqçilər: Arif Abdullayev, Taymuraz Kokoyev, Şərif Şərifov
• İslam Bazarqanov (57 kq), Nürəddin Novruzov (61 kq), Rəşid Babazadə (65 kq), Kənan Heybətov (70 kq), Turan Bayramov (74 kq), Cəbrayıl Hacıyev (79 kq), Arseniy Djioyev (86 kq), Ali Tsokayev (92 kq), Maqomedxan Maqomedov (97 kq), Giorgi Meşvildişvili (125 kq)

Yarış Barıs Arena-da keçiriləcək; gündüz seansları Bakı vaxtı ilə 09:30-da, axşam seansları isə 17:00-da başlayacaq. I-S dərəcəli referilərimiz Asif Şirəliyev və Sədi Quliyev dünya çempionatında ədaləti qoruyacaqlar.

Mənbə: GettoSport