Azərbaycan U-15 millisinin baş məşqçisi turnirə hazır olduqlarını bildirdi

17 oktyabr 2026 — Azərbaycanın U-15 futbol millisi FIFA U-15 Dünya Çempionatı və Festivalına hazır olduğunu açıqlayıb. Baş məşqçi Famil Xəlilov hazırlıq prosesinin planlaşdırıldığı kimi davam etdiyini və komandada həm fiziki, həm də psixoloji durumun yaxşı olduğunu vurğulayıb.

Xəlilov bildirib: “Hazırlıqlarımız planlaşdırdığımız kimi davam edir. Futbolçularımızın fiziki və psixoloji durumu yerindədir. Turnirin böyüklüyünü nəzərə alsaq, futbolçularda müəyyən həyəcan hiss olunur, lakin istəyimiz və motivasiyamız yerindədir”. O, komandanın məqsədini də açıqlayıb: “Məqsədimiz sadəcə iştirakçı olmaq deyil, meydanda sona qədər mübarizə aparıb, qələbə üçün əlimizdən gələnin ən yaxşısını etməyə çalışacağıq.”

Xəlilov həmçinin turnirin gənc oyunçular üçün əhəmiyyətinə diqqət çəkib: “Bu turnir həm gənc futbolçularımız, həm də Azərbaycan futbolu üçün böyük təcrübədir. Futbolçularımız beynəlxalq səviyyənin real təcrübələrini görəcəklər. Biz məşqçilər də onların gələcək inkişafı üçün hansı istiqamətdə daha çox işləməli olduğumuzu daha aydın təyin edəcəyik.”

Qeyd edək ki, FIFA U-15 Dünya Çempionatı və Festivalı oktyabrın 22–31-də keçiriləcək. Püşkatmaya əsasən yarışda ümumilikdə 191 milli komanda iştirak edəcək və onlar 32 qrupa bölünüblər — bir qrupda 5, digər 31 qrupda isə 6 komanda yer alır. Azərbaycan “AF” qrupunda Andorra, Avstraliya, Haiti, İsrail və Şərqi Timorla birgə mübarizə aparacaq.

Turnir 8-ə 8 formatında keçiriləcək; qarşılaşmalar iki hissədən ibarət olacaq və hər hissə 20 dəqiqə davam edəcək.

Mənbə: GettoSport