Azərbaycan Velosiped İdmanı Federasiyası iclas keçirib

26 oktyabr 2026-cı il tarixində Azərbaycan Velosiped İdmanı Federasiyasının İcraiyyə Komitəsinin iclası keçirilib. İclas federasiya prezidentinin giriş sözü ilə açılıb, görüşdə federasiyanın son dövrdə gördüyü işlər və qarşıdakı planlar müzakirə edilib.

İclasda federasiya prezidenti Zaur Axundov iştirakçıları gündəlikdəki məsələlərlə tanış edib. Çıxış üçün söz federasiyanın birinci vitse-prezidenti Sahib Ələkbərova verilib. Sahib Ələkbərov vurğulayıb ki, 2025-ci ilin mayından yeni rəhbərlik ölkədə velosiped idmanını COVID-19-dan əvvəlki səviyyəyə qaytarmaq məqsədini əsas prioritet olaraq müəyyən edib və 2025–2028-ci illər üçün İnkişaf Strategiyasının istiqamətlərinə uyğun tədbirlər həyata keçirilib.

Hesabatda federasiyanın maddi-texniki bazasının bərpası qeyd olunub: velotrekdəki beton örtük və tribuna təmir olunub, mini-futbol meydançası və qazanxana bərpa edilib, federasiyanın balansındakı avtomobillərin istifadəyə yararlı hissəsi təmir edilərək işlək vəziyyətə gətirilib. Yarışlar və beynəlxalq tədbirlər də hesabatın vacib hissəsini təşkil edib.

Federasiya Baku–Khankendi Azerbaijan Cycling Race adlı 2.1 səviyyəli beynəlxalq yarışı UCİ təqviminə salıb və cari ilin 10–14 may tarixlərində yarış uğurla keçirilib. Yarışa 20 ölkədən 24 komanda qatılıb, marşrut ölkəmizin 21 şəhər və rayonundan keçib və "Eurosport" kanalı vasitəsilə 190 ölkədə yayımlanıb. "Eurosport"un rəsmi hesabatına görə yarışın reklam videoçarxı 20 milyondan çox baxış toplayıb. Turnirin təşkili üçün 25 ədəd yeni avtomobil və digər avadanlıqlar alınmışdır. Federasiyanın Instagram səhifəsinə daxilolma sayı yarış günlərində ilk dəfə 2 milyonu keçib.

İcraçı vitse-prezident Fikrət Hüseynov bildirib ki, Respublika Olimpiya Ehtiyat Qüvvələri İxtisaslaşdırılmış Uşaq-Gənclər Velosiped Məktəbinin fəaliyyəti canlandırılıb. Hazırda ölkənin 18 şəhər və rayonunda 22 velosiped bölməsi yaradılıb və bu bölmələrdə 500-dən çox uşaq məşğul olur; bölmələr üçün peşəkar məşqçilər seçilərək onlara təlimlər keçirilib. Gəncə, Mingəçevir, Lənkəran kimi şəhərlər bu fəaliyyətin nümunələri sırasındadır.

Sahib Ələkbərov qarşıdakı dövrdə prioritetləri regionlarda fəaliyyətin gücləndirilməsi, uşaq və yeniyetmələrin idmana cəlbi, yeni bölmələrin yaradılması və beynəlxalq yarışlarda idmançıların rəqabət qabiliyyətinin artırılması kimi müəyyən edib.

Mənbə: GettoSport