AZERRAIL mövsümə qələbə ilə başladı, ORDU da qalib oldu

24 oktyabr 2026, Şənbə. Kişilər arasında Super Liqanın 2026–2027-ci il mövsümü oktyabrın 24-də start götürüb. GİN-in Voleybol Mərkəzində I turun ilk oyununda AZERRAIL komandası Gənclər klubunu məğlub edib, günün digər görüşündə ORDU Murov Az Terminal üzərində qələbə qazanıb.

AZERRAIL – Gənclər görüşü 3:0 hesabı ilə yekunlaşıb. Setlər 25:17, 25:11, 25:16 olub. ORDU və Murov Az Terminal arasındakı oyun da 3:0 nəticələnib; setlər 25:20, 25:14, 25:20 qeydə alınıb.

I turun növbəti matçında Xilasedici və Neftçi komandaları qarşılaşacaq. Bu görüş oktyabrın 24-də saat 17:00-da FHN-in idman zalında keçiriləcək.

Super Liqada altı komanda iştirak edir: Xilasedici, ORDU, Neftçi, Murov Az Terminal, AZERRAIL və Gənclər. Yarış dairəvi sistemlə, ev-səfər prinsipi üzrə iki dövrədə keçiriləcək. İki dövrənin sonunda turnir cədvəlinin ilk dörd pilləsində qərarlaşan kollektivlər pley-off mərhələsinə vəsiqə qazanacaqlar.

Mənbə: GettoSport