Cüdo hakimləri Bakıda praktiki seminarda təkmilləşdi

20 oktyabr 2026, Çərşənbə axşamı. Azərbaycan Cüdo Federasiyasının Hakimlər Komitəsi ölkə daxilində növbəti praktiki seminar keçirib. Tədbirin təşkilinə ACF rəhbərliyi və Hakimlər Komitəsi məsuliyyət daşıyıb.

Seminar ACF prezidentinin müşaviri və Hakimlər Komitəsinin sədri Natiq Bağırov, ACF-nin hakimlər üzrə meneceri, A kateqoriyalı beynəlxalq dərəcəli hakim Mətin Rəhimli və Hakimlər Komitəsinin üzvü Abbas Şahverdiyev tərəfindən idarə olunub.

Tədbirin əsas məqsədi Bakıda keçirilmiş cüdo üzrə dünya çempionatında hakimlik təcrübəsi əsasında əldə olunan yeni bilikləri yerli hakimlərə çatdırmaq, qaydalara edilmiş düzəlişləri təqdim etmək və aktual yanaşmalar üzərində praktiki müzakirələr aparmaq olub. Seminar zamanı dünya çempionatında qeydə alınan müxtəlif hakimlik epizodları təhlil edilib və qaydaların tətbiqi ilə bağlı yeniliklər müzakirə edilib.

Praktiki məşğələlər və epizodların təhlili vasitəsilə hakimlərin qərarvermə prosesində vahid yanaşmanın formalaşdırılması və gələcək yarışlarda uyğunluğun təmin edilməsi hədəflənib.

Mənbə: GettoSport