Emin Mahmudov millinin formasını tərk etdiyini açıqladı

6 noyabr 2026 — Azərbaycan milli komandasının kapitanı Emin Mahmudov milli formada çıxışına son qoyacağını açıqlayıb. O, bu qərarı Andorra ilə keçiriləcək yoldaşlıq oyunundan sonra reallaşdıracağını sosial şəbəkə paylaşımında bildirib. Bu barədə Sportal.az məlumat yayıb.

34 yaşlı yarımmüdafiəçi paylaşımında hər kəsə təşəkkürünü bildirib və milli formaya aid xatirələrini vurğulayıb. Mahmudov yazıb: "Bu gün qəlbimdə həm qürur, həm də kövrəkliklə sizinlə vacib bir qərarımı bölüşürəm: Azərbaycan milli komandasındakı karyeramı başa vururam."

O, ilk dəfə milli formaya girdiyi günü unuda bilmədiyini, ölkəni təmsil etməyin və komandaya kapitanlıq etməyin karyerasının ən gözəl illərindən olduğunu qeyd edib. Mahmudov həmçinin komanda yoldaşlarına, məşqçilərə və onu dəstəkləyən azarkeşlərə xüsusi minnətdarlıq bildirib: "Bu illər mənə unudulmaz anlar, dəyərli dostluqlar və sözlə ifadə etməkdə çətinlik çəkdiyim duyğular bəxş etdi."

Paylaşımda kapitan həmçinin sevinc və çətin anları birlikdə yaşadıqlarını vurğulayıb və hər kəsə təşəkkürünü çatdırıb.

Mənbə: Sportal.az

Hazırladı: GettoSport