FIFA seminarı Boots for All festivalı ilə yekunlaşdı

29 oktyabr 2026 — FIFA-nın təşkil etdiyi "Məktəblərdə Futbol" seminarı praktiki və nəzəri sessiyalardan sonra Boots for All adlı kütləvi festivalla yekunlaşıb. Günün proqramı meydançada keçirilən məşq sessiyası ilə başlayıb və tədris hissəsi ilə davam edib.

Seminarda FIFA nümayəndələrinin rəhbərliyi altında iştirakçılar müxtəlif futbol tapşırıqlarını yerinə yetirərək oyun əsaslı öyrənmə metodlarını praktikada sınaqdan keçiriblər. Nəzəri sessiyalarda isə proqramın məktəblərdə tətbiqi, məşğələlərin təşkili və müəllimlərin metodoloji hazırlığı müzakirə olunub.

Boots for All festivalına 120-dən çox uşaq qoşulub. Açılış mərasimində əfsanəvi veteran futbolçu Xristo Stoiçkov uşaqlar üçün futbolun dostluq, komanda ruhu və qarşılıqlı hörmət kimi dəyərləri formalaşdırdığını vurğulayıb və onları futboldan zövq almağa çağırıb.

Açılışda AFFA-nın baş katibi Cahangir Fərəcullayev FIFA nümayəndələrinə təşəkkür edib, iştirakçılara uğurlar arzulayıb. Daha sonra baş katib və AFFA İcraiyyə Komitəsinin üzvü Leyla Xəlilova Rzazadə FIFA nümayəndələrinə xatirə hədiyyələri təqdim ediblər.

Tədbirin sonunda hər bir iştirakçının FIFA tərəfindən futbol butsları ilə təmin olunduğu bildirilib və tədbir xatirə şəkli ilə bağlanıb. Bu tədbir FIFA, AFFA və Azərbaycanın Elm və Təhsil Nazirliyinin birgə həyata keçirdiyi "FIFA Football for Schools" proqramının tərkib hissəsi olub və proqramın məqsədi məktəblərdə futbolun inkişafı, müəllimlərin peşəkarlıq səviyyəsinin yüksəldilməsi və uşaqların fiziki-sosial inkişafının dəstəklənməsidir.

Mənbə: GettoSport