FIFA U-15 Dünya Kuboku Bakıda 78 yeni ölkəni gətirir

22 oktyabr 2026, Cümə axşamı.

Oktyabrın 24-də Bakıda start götürəcək ilk FIFA U-15 Dünya Kuboku və Festivalında 189 üzv assosiasiyadan 78-i FIFA-nın dünya çempionatlarında ilk dəfə təmsil olunacaq. Turnir Azərbaycanda təşkil olunacaq və komandalar altı günlük proqram çərçivəsində yarışacaqlar.

Tədbir FIFA-nın yeni layihəsidir və məqsəd dünya üzrə 15 yaşadək futbolçuların uzunmüddətli inkişafını dəstəkləməkdir. Oğlanlar kateqoriyasında yarışa 2011 və 2012-ci illərdə anadan olmuş oyunçular qatılır; qızlar arasında ilk turnir 2027-ci ildə keçiriləcək, 2028-ci ildən etibarən isə hər iki kateqoriya üzrə yarışlar illik olacaq.

FIFA-nın yeniyetmələr üzrə rəhbəri Roberto Qrassi turnirin əhəmiyyətini vurğulayaraq bu layihənin gənclər üçün unikal təcrübə yaratdığını bildirib: “Təsəvvür edirsinizmi, bu gənc oğlanlardan neçəsi həyatında ilk dəfə ölkə xaricinə səfər edəcək və öz ölkəsinin formasını geyinəcək? Biz məhz bunun üçün buradayıq”. Qrassi AFFA ilə əməkdaşlığa da yüksək qiymət verib.

Turnirin formatı da inkişaf yönümlüdür: üç günlük təsnifat mərhələsindən sonra komandalar altı səviyyəyə bölünərək üç günlük turnir mərhələsində çıxış edəcəklər. Pley-off nəzərdə tutulmayıb, beləliklə hər komanda yarışın son gününədək oyunlar keçirəcək. A səviyyəsinin qalibi FIFA U-15 Dünya Kuboku və Festivalının çempionu elan olunacaq.

Oyun qaydalarında da yeniliklər var: hər komandada səkkiz futbolçu iştirak edəcək, oyunlar iki hissədən ibarət və hər hissə 20 dəqiqə davam edəcək; sərbəst əvəzetmələrə, topun yan xətdən ayaqla yenidən oyuna daxil edilməsinə icazə veriləcək və meydanlar uşaq futboluna uyğun kiçildiləcək. Komandalar həmçinin maarifləndirici tədbirlərdə iştirak edəcək və futbol əfsanələri ilə görüşəcəklər.

FIFA 211 üzv assosiasiyanın hamısına dəvət göndərib, 189 assosiasiya qatılacağını təsdiqləyib. AFFA ilə birgə təşkil olunan tədbir üçün Bakı yüksək səviyyəli idman infrastrukturu və mərkəzləşdirilmiş təşkilati imkanlara malikdir.

Mənbə: GettoSport