Formula-1 Bakı üçün əsas turizm hadisəsinə çevrildi

10-cu dəfə keçirilən Formula-1 üzrə Azərbaycan Qran-prisi paytaxta minlərlə xarici qonaq gətirərək Bakını əsas turizm hadisələrindən birinə çevrilib. Yarış dörd gün ərzində baş tutub və şəhərin iqtisadi fəallığına əhəmiyyətli təsir göstərib.

Euronews-un yubiley mərhələsinə həsr olunmuş süjetində qeyd olunub ki, yarış həftəsonu mehmanxana biznesi, pərakəndə ticarət və xidmət sektorunda fəallığın kəskin artmasına səbəb olub.

Statistik göstəricilər

Qran-prinin keçirildiyi dörd gün ərzində 92 mindən çox azarkeş girişi qeydə alınıb; tribunada isə 17 mindən çox xarici azarkeş yarışları izləyib. Biletlər 120-dən çox ölkədən olan tamaşaçılar tərəfindən əldə edilib.

Süjet yarışın təşkilinə minlərlə əməkdaş, könüllü və marşalın cəlb edildiyini vurğulayıb və genişmiqyaslı təşkilatçılığın Formula-1-in Bakı üçün iqtisadi və turizm əhəmiyyətini daha da artırdığını bildirib.

Euronews həmçinin 10-cu Azərbaycan Qran-prisinin müasir şəhər trası ilə tarixi İçərişəhər arasındakı kontrastı bir daha qabardığını qeyd edib.

Yarışın turizm sənayesinə, mehmanxana biznesinə, pərakəndə ticarətə, xidmət sektoruna və məşğulluğa təsiri süjetdə xüsusi vurğulanıb.