Hanna Zaytseva Polşadan Azərbaycana keçidini izah etdi

22 oktyabr 2026 — Ukrayna əsilli 19 yaşlı cüdoçu Hanna Zaytseva oktyabrda Bakıda keçirilən böyüklər arasında dünya çempionatında Azərbaycan millisində debüt edib, lakin medal qazana bilməyib. Onun ölkə dəyişməsi Polşa Cüdo İttifaqının narazılığına və sosial mediada ittihamlara səbəb olub.

Zaytseva daha əvvəl beynəlxalq yarışlarda Polşanın adından çıxış edib və yeniyetmələr səviyyəsində dünya çempionatında gümüş medal qazanıb. Polşa tərəfi idmançıya ölkədə göstərilən maliyyə, tibbi və məşq dəstəyini xatırladaraq narazılıq bildirib.

İdmançı qərarının əsas səbəbi kimi vətəndaşlıq və sənədləşmə ilə bağlı qeyri-müəyyənliyi göstərib: “Polşanı öz evim hesab edirəm. Əgər bütün lazımi sənədlərim olsaydı, ölkəmi dəyişməyi heç düşünməzdim. Amma bunun nə qədər davam edəcəyini bilmədən daha çox gözləyə bilməzdim. Vaxt keçir, idman karyerası isə təəssüf ki, çox qısadır”, — deyə Zaytseva bildirib.

Zaytseva həmçinin çiyin əməliyyatından sonra reabilitasiya xərclərini klubun — Akademia Judo-nun öz üzərinə götürdüyünü və federasiyanın həmin dövrdə lazım olan dəstəyi göstərmədiyini deyib. O, Azərbaycanda karyerasını davam etdirməsi üçün lazımi şərait yaradıldığını bildirib, lakin Bakıya uyğunlaşmanın çətin olduğunu etiraf edib.

Polşada dərc olunan bir məqalənin müəllifi isə Zaytsevanın qərarını başa düşülən hesab edib və gənc idmançının sosial mediada üzləşdiyi ittihamları tənqid edərək onun seçimlərinin motivlərini araşdırmağa çağırıb.

Mənbə: GettoSport