İslam Nəcəfquliyev və Vilayət Rəhimli beynəlxalq hakimlik dərəcəsi qazandı

İslam Nəcəfquliyev və Vilayət Rəhimli 6–8 noyabr 2026-cı il tarixlərində Macarıstanın Dyör şəhərində təşkil olunan Beynəlxalq Cüdo Federasiyasının (IJF) seminar və imtahan proqramını uğurla başa vuraraq “B” kateqoriyalı beynəlxalq dərəcəli hakim adını qazanıblar. Bu barədə Sportinfo.az məlumat yayıb.

Seminarın nəzəri və praktiki hissələri noyabrın 6–8-də keçirilib. Nəzəri proqramda yarış qaydalarının tətbiqi, texniki hərəkətlərin qiymətləndirilməsi və müxtəlif görüş vəziyyətlərində hakim qərarlarının verilməsi video nümunələr əsasında təhlil olunub.

Praktiki sınaqlar noyabrın 7–8-də Dyördə keçirilən yeniyetmələr arasında Avropa Kuboku çərçivəsində təşkil edilib. Həmin mərhələdə hər iki hakim qaydaların düzgün tətbiqi, tatamidə mövqe seçimi, qərarların ardıcıllığı və görüşlərin idarə olunması üzrə qiymətləndirilib.

Bütün mərhələləri uğurla keçən İslam Nəcəfquliyev və Vilayət Rəhimliyə “B” kateqoriyasını təsdiq edən diplom, eyni zamanda müvafiq qalstuk və döş nişanları təqdim edilib.

Mənbə: Sportinfo.az

Hazırladı: GettoSport