Lüksemburq Bakıda ilk dəfə dünya çempionatında iştirak edəcək

23 oktyabr 2026 — Lüksemburqun yığması tarixində ilk dəfə FIFA səviyyəli dünya çempionatında iştirak edəcək: 24–30 oktyabr tarixlərində Bakı şəhərində keçiriləcək I FIFA U-15 Dünya Çempionatı və Festivalında ölkəni Pol Hansenin rəhbərlik etdiyi kollektiv təmsil edəcək.

RTL Today nəşrinə istinadən bildirilib ki, turnirdə Lüksemburqun heyəti 2011–2012-ci il təvəllüdlü 14 futbolçudan ibarət olacaq. "Bu, Lüksemburqun futbol üzrə iştirak etdiyi ilk dünya çempionatıdır. Bu dəfə turnirdə iştirak etmək üçün seçmə mərhələdə mübarizə aparmağa ehtiyac olmayıb", — qeyd olunub. Baş məşqçi oyunçuların hər qarşılaşmadan maksimum təcrübə götürməyə çalışacaqlarını vurğulayıb.

Turnirin formatı xüsusi olacaq: komandalar səkkiz nəfərlik heyətlə meydana çıxacaq, oyunlar iki hissədən ibarət olmaqla hər biri 20 dəqiqə davam edəcək. Hər yığma turnir ərzində ən azı doqquz oyun keçirəcək və ilkin mərhələdən sonra komandalar nəticələrə görə altı səviyyəyə bölünərək oxşar səviyyəli rəqiblərlə mübarizəni davam etdirəcəklər.

Lüksemburq Q qrupunda yer alıb. Komandanın rəqibləri Sent-Vinsent və Qrenadinlər, Butan, Koreya Respublikası, Litva və Birləşmiş Ərəb Əmirlikləri olacaq. İlk oyun oktyabrın 24-də Bakı vaxtı ilə saat 11:30-da Sent-Vinsent və Qrenadinlərə qarşı keçiriləcək. Nümayəndə heyətində məşqçi və inzibati heyətin altı üzvü, həkim və məktəb müəllimi də olacaq — federasiya futbolçuların Azərbaycanda təhsilini davam etdirmələri üçün şərait yaradıb.

Turnirdə ümumilikdə 189 milli komanda iştirak edəcək və FIFA məlumatına görə, onlardan 78-i ilk dəfə dünya çempionatlarında mübarizə aparacaq.

Mənbə: GettoSport