Maks Ferstappen Ferrari-yə keçid şərtini bildirdi

Red Bull komandasının niderlandlı pilotu Maks Ferstappen gələcəkdə karyerasını Ferrari-də davam etdirmək ehtimalı barədə fikirlərini bölüşüb. Dördqat Formula-1 dünya çempionu İtaliya təmsilçisinə böyük hörmət bəslədiyini, lakin bu addımın yalnız qələbələr uğrunda yarışmaq şansı olduğu təqdirdə məna kəsb edəcəyini vurğulayıb.

Niderlandlı sürücü sadəcə ən yüksək pillə uğrunda mübarizə aparmaq niyyətində olduğunu diqqətə çatdırıb:

“Mən yalnız qalib gəlmək istəyirəm. Nostaljiyə qapılanlardan deyiləm. Ferrari brendinə böyük hörmətim var? Şübhəsiz. Amma bu o deməkdir ki, öhdəlik götürüb gəlirsən və sonra beşinci, ya da altıncı olursan? Onda bunun nə mənası var?”

Hazırkı komandası ilə bağlılığını da dilə gətirən Ferstappen Red Bull ilə artıq böyük nailiyyətlər əldə etdiyini xatırladıb. O, bütün diqqətini nəticəyə yönəltdiyini, hazırkı kollektivin onun üçün ikinci ailə olduğunu və məhz dəyişikliklərə can atmağın onu irəli apardığını əlavə edib.