Mbappe-ni sərt tənqid edən jurnalist onun davranışlarını pislədi

9 oktyabr 2026 — Fransalı jurnalist David Riolo Madridin Real və Fransa millisinin hücumçusu Kilian Mbappenin son davranışlarını RMC radiosunun After Foot proqramında sərt tənqid edib.

Riolo bildirib ki, Mbappenin zədələnmədən sonra davranışları və ictimai görünüşləri qəbuledilməzdir. Jurnalistə görə, futbolçu “hələ də futbol oynamaq həvəsi varmı?” sualını doğurur və o, belə davam edə bilməyəcəyini vurğulayıb.

Riolonun sözlərinə görə: “O, nə istəyir? Sanki hər səhər ‘Bu gün yenə nəyisə korlayacağam’ düşüncəsi ilə oyanır. O, belə səhvləri təkrarlamağa davam edə bilməz. Mbappe zədəli idi, amma Parisdə gəzirdi. Heç olmasa, müsbət mesaj ver. ‘Stad de Frans’a gəl - istəmir. Madriddə qal - istəmir. Gecə klubunun çıxışında görünmə - yenə istəmir. Bəsdir! Artıq həddi aşırsan.”

Riolo əlavə edib ki, onun təəssüratına görə, Mbappe psixoloji baxımdan yaxşı durumda deyil: “Futbol, ətrafında baş verənlər və ondan gözlənilənlər Mbappeni yorub. Onun nə etmək istədiyini başa düşmürəm. Bu cür münasibət sonda hamıdan uzaqlaşmasına səbəb olacaq.”

Xatırladaq ki, Kilian Mbappe Fransa millisinin UEFA Millətlər Liqasında Türkiyəyə qarşı 1:0 hesablı qələbə qazandığı oyunda zədələnib. Zədələnmədən sonrakı dövrdə futbolçu əvvəlcə Parisdə bir gecə klubunda görüntülənib, daha sonra isə velosiped sürdüyü videonu sosial şəbəkədə paylaşıb.

Riolonun tənqidləri və futbolçunun son görüntüləri Fransa futbol ictimaiyyətində müzakirələrə səbəb olub.