Mezzotero Sampdoriya əsas heyətinə çağırıldı

28 oktyabr 2026 — İtaliyanın Sampdoriya klubunun azərbaycanlı hücumçusu Lorenzo Mezzotero əsas komandanın növbəti oyunu üçün heyətə çağırılıb. Baş məşqçi Luka Dancelo gənc futbolçunu B Seriyasının doqquzuncu turunda Askoli ilə görüş üçün iştirak ərizəsinə daxil edib.

Mezzotero həmin qarşılaşmada meydana çıxmasa da, 39 nömrəli formanı geyinən futbolçu əsas komandanın heyətində daha əvvəl Juve Stabiya və Palermo ilə oyunların son dəqiqələrində meydana çıxıb.

U-19 komandasının kapitanı olan Mezzotero Primavera 2 çempionatında mövsümə yaxşı start verib: altı oyunda səkkiz qol vurub və iki məhsuldar ötürmə edib. O, hazırda turnirin bombardirlər siyahısında liderlik edir.

Lorenzo Mezzotero Monza şəhərində anadan olub, lakin uşaqlıq illərini Azərbaycanda keçirib. Atasının SOCAR-da çalışması ilə əlaqədar 2014-cü ildə Bakıya köçən hücumçu ilk addımlarını Qarabağ-ın uşaq komandalarında atıb, daha sonra Leon və Neftçi akademiyalarında çıxış edib.

2020-ci ildə ailəsi ilə İtaliyaya qayıdan Mezzotero Atalanta və İspaniyanın Marcet akademiyalarında hazırlıq keçib. O, 2024-cü ildə Sampdoriya-ya qoşularaq avqustun 29-da Juve Stabiya ilə oyunda əsas komandada debüt edib.

Azərbaycan vətəndaşlığı da olan futbolçu bu ilin iyununda U-21 millimizin heyətində ilk dəfə meydana çıxıb və iyunun 6-da Bəhreynlə yoxlama görüşündə millimizin üçüncü qolunu vurub (3:0).

Mənbə: GettoSport