Mixail Timofeyev Gürcüstandakı nəticəni dəyərləndirdi

Azərbaycan stolüstü tennisinin baş məşqçisi Mixail Timofeyev oktyabrın əvvəllərində Gürcüstanda keçirilən WTT Youth Contender Tbilisi 2026 turnirində komandanın çıxışını dəyərləndirib. Turnirdə 25 ölkədən idmançılar iştirak edib.

Timofeyev bildirib ki, məşqçilər korpusu yarımfinallarda daha yaxşı nəticə gözləsə də, ümumilikdə idmançıların performansından razıdır: “Yarımfinallarda daha yaxşı nəticə gözləyirdik. İndi bütün səhvlərimizi təhlil edəcəyik və növbəti yarışlara hazırlaşacağıq. Ümid edirik ki, gələcəkdə daha yaxşı çıxış edəcəyik. Ümumilikdə isə razıyıq”.

Baş məşqçi şəxsi məşqçisi olduğu perspektivli üzv Onur Quluzadə haqqında da danışıb. Timofeyev qeyd edib ki, Onur 15 yaşında olmasına baxmayaraq bu dəfə 19 yaş kateqoriyasında iştirak edib və belə turnirdə ilk iştirakında müəyyən uğur qazanıb: “Onun 15 yaşı var, bu yarışda isə 19 yaşlı idmançılar arasında çıxış etdi. O, ilk dəfə bu yaş kateqoriyasında belə bir turnirdə iştirak etdi və bu nəticəni qazandı. Halbuki biz qələbə qazanmağı planlaşdırırdıq. Amma öz üzərimizdə işləyəcəyik”.

Timofeyev həmçinin yaxın perspektiv üçün planları açıqlayıb: ayın sonunda böyüklərdən ibarət milli komanda Çinə təlim-məşq toplanışına yollanacaq, yeniyetmələrdən ibarət komandamız isə Latviya beynəlxalq turnirində iştirak edəcək. Dekabr ayında isə Azərbaycan idmançılarının Finlandiyada keçiriləcək Açıq Çempionatda çıxışı nəzərdə tutulur.