Nazim Sadıxov zədə səbəbindən UFC döyüşündən çəkildi
Azərbaycanlı UFC döyüşçüsü Nazim Sadıxov təlim düşərgəsində aldığı zədə üzündən noyabrın 14-də planlaşdırılan döyüşə çıxmayacaq; əməliyyat tələb olunmur.
GettoSport redaksiyası••1 dəq oxu
7 oktyabr 2026, Çərşənbə.
Azərbaycanlı UFC döyüşçüsü Nazim Sadıxov təlim düşərgəsində aldığı zədə üzündən UFC Fight Night tədbirində döyüşməyəcək. Sadıxov sosial media hesabında bu qərarı və zədə vəziyyətini açıqlayıb.
Döyüşçü yazıb ki, təlim düşərgəsinin ilk günlərində zədə alıb və artıq 5 həftədən çoxdur onunla mübarizə aparır. Əvvəlcə plan var idi ki, zədəyə baxmayaraq hazırlıq davam etdirilsin və döyüşə çıxılsın, lakin rəqibinin də zədə səbəbi ilə çəkilməsi üzündən o və komandası UFC-yə başqa rəqib axtarmamağı bildirdilər.
Nazim Sadıxov həmçinin bildirib ki, zədə üçün əməliyyat və ya uzunmüddətli reabilitasiya tələb olunmayacaq: “Yaxşı xəbər odur ki, əməliyyata və ya uzunmüddətli bərpa prosesinə ehtiyacım olmayacaq. Bu zədəni sağaldacağam və mümkün qədər tez döyüşə qayıdacağam.” O, dəstək olan hər kəsə təşəkkürünü çatdırıb.
Qeyd edək ki, Sadıxovun noyabrın 14-də Jefferson Nascimento ilə qarşılaşması planlaşdırılmışdı.
