Nazim Süleymanov Bakıda U-15 turnirini tərifləyib

1 noyabr 2026. Azərbaycanın sabiq hücumçusu Nazim Süleymanov Bakının ev sahibliyi etdiyi FIFA U-15 Dünya Çempionatı və Festivalını yüksək qiymətləndirib və turnirin gənc futbolçularımız üçün önəmini vurğulayıb. Bu barədə Sportinfo.az məlumat yayıb.

Süleymanov çıxışında turnirin 15 yaşlı oyunçulara çoxlu oyun və dünya səviyyəli təcrübə qazandıracağını bildirib: “Turnirin keçirilməsini çox müsbət qiymətləndirirəm. Çünki 15 yaşlı futbolçularımız üçün bu, çoxlu oyun keçirmək və dünya miqyasında təcrübə qazanmaq baxımından əla fürsətdir. Bir futbol adamı kimi bu, mənim üçün də çox sevindirici haldır”.

O, həmçinin paytaxtda yaradılan infrastrukturdan danışaraq bunun gənclər üçün böyük imkan olduğunu qeyd edib: “İnfrastruktur da möhtəşəmdir. Bu fürsət elə bil bizim üçün göydən düşmə oldu. İndi gənc futbolçularımız üçün belə bir imkan yaradılıb. Onlar bu şəraitdən yaxşı istifadə etməlidirlər. Futbolçularımız yaradılan imkanlardan yararlanaraq özlərini Avropa futboluna hazırlamalıdırlar”.

Mənbə: Sportinfo.az

Hazırladı: GettoSport