Neftçi baş məşqçisi ehtiyat oyunçuların rolunu vurğuladı

10 oktyabr 2026 — Neftçi baş məşqçisi Konstantinos Vasiliadis Azərbaycan Basketbol Liqasının ikinci turunda Ordu üzərində 83:79 hesablı qələbə qazandıqları matç barədə fikirlərini bölüşüb.

Vasiliadis oyunun komanda üçün yenidən başlamaq imkanına çevrildiyini bildirib və son iki oyundakı çıxışlarının onları qane etmədiyini qeyd edib: “Bəli, düşünürəm ki, bu oyun bizim üçün bir fürsət idi. Son iki oyunda öz səviyyəmizdə çıxış edə bilmədik. Hamımız bilirik ki, hələ istədiyimiz səviyyədə deyilik. Həmin səviyyəyə çatmaq üçün bəlkə də bir ay, yaxud bir qədər artıq vaxt lazımdır.”

Baş məşqçi iki əsas oyunçunun yoxluğunun komandanın mübarizəsinə təsir etdiyini, ancaq digər basketbolçuların onların yerini doldurduğunu vurğulayıb: “İki əsas oyunçumuz müəyyən problemlərə görə meydana çıxa bilmirdi. Onları digər oyunçular əvəz etməli, komanda üçün mübarizə aparmalı və öz töhfələrini verməli idilər. Bütün oyunçuların yaxşı çıxış etməsindən çox məmnunam.”

Vasiliadis xüsusilə ehtiyatdan meydana daxil olanların çıxışını təqdir edib: “Xüsusilə, ehtiyatdan meydana daxil olan Cəbrayıl, Derin və Ulaşın çıxışını qeyd etmək istəyirəm. Onlar start heyətində yer almasalar da, komandaya böyük kömək etdilər və qələbəmizdə mühüm rol oynadılar.”

O, həmçinin yerli oyunçuların performansından və komandada formalaşan ruhdan razılığını ifadə edərək mövsümün uzun marafon olduğunu xatırladıb: “Komanda olaraq hər kəsə göstərdik ki, yaxşı və möhkəm kollektivə sahibik... Qələbəyə görə məmnunam, amma qarşıda bizi hələ çox iş gözləyir. Əvvəl də dediyim kimi, bu, uzun bir marafondur və bütün mövsüm ərzində bu mübarizəyə hazır olmalıyıq.”