Nihad Əhmədzadə ilə bağlı göndərilmə iddiası təkzib olundu

Sumqayıt futbolçusu və U-21 millimizin üzvü Nihad Əhmədzadənin əvəzedici heyətə göndəriləcəyi barədə yayılan iddialar rədd edilib. Məlumat futbolçunun müqaviləni uzatmaqdan imtina etməsi və klub prezidenti Riad Rəfiyevin narazılığı ilə əlaqələndirilirdi.

Yayılan xəbərlərdə bildirilirdi ki, klub rəhbərliyi Əhmədzadəyə köhnə şərtlərlə yeni müqavilə təklif edib, o isə əməkhaqqının az olduğunu düşünərək razılaşmayıb. Həmçinin futbolçunun "Sumqayıt"da ən aşağı maaş alanlardan olduğu qeyd olunub. İddiaya görə, bu səbəbdən prezident məsələyə sərt reaksiya verərək onu əvəzedici heyətə göndərmək qərarına gəlib.

Məsələ ilə bağlı klubun mətbuat katibi Zaur Xudiyev açıqlama verib və yayılan məlumatların həqiqəti əks etdirmədiyini bildirib. Klub sözçüsü qeyd edib ki, Əhmədzadə hələ U-21 millisinin düşərgəsindədir və kluba qoşulduqdan sonra əsas komanda ilə, yaxud əvəzedicilərlə məşq edib-etməyəcəyi baş məşqçinin qərarından asılı olacaq.

"Klub prezidenti və futbolçu arasında olan prinsip söhbəti ümumiyyətlə həqiqətə uyğun olmayan məlumatdır. Heç bir futbolçu ilə klub rəhbəri arasında hansısa prinsip və ya anlaşılmazlıqdan söhbət gedə bilməz"

Klub nümayəndəsi həmçinin futbolçunun kluba qayıdışından sonra hansı komandada iştirak edəcəyinin ancaq baş məşqçinin qərarı ilə müəyyənləşəcəyini vurğulayıb.