Nihad İsmayılov: Dünya çempionatına vəsiqə qazanacağıq

16 oktyabr 2026 — Azərbaycan milli futzal komandası bu gün Çexiya ilə əsas seçmə mərhələnin ilk turunda Frýdek-Mistek şəhərindəki Hala Polarka idman arenasında qarşılaşıb. Oyun Bakı vaxtı ilə saat 22:00-da başlayıb.

"Komandada əhval-ruhiyyə çox yaxşıdır. Yeni baş məşqçi Elvin Quliyev də bizə inanır, yaxşı kollektiv formalaşdırmaq üçün çalışır", — deyə millinin üzvü Nihad İsmayılov AZƏRTAC-a müsahibəsində bildirib. O, həmçinin Çexiyanı kağız üzərində favorit saydığını vurğulayıb.

İsmayılov rəqibi analiz etdiklərini və onun heyətində 3-4 təcrübəli oyunçu olduğunu qeyd edib: "Digərləri isə gənc futzalçılardır. Çexiya seçməsi əsasən hava toplarına üstünlük verir. Cüssəli oyunçuları var. Bu məqamlara xüsusi hazırlaşmışıq. Düşünürəm ki, bu rəqibi məğlub etmək olar".

"Neftçi" klubunun formasını geyinən İsmayılov millinin qrupdakı hədəflərinə də toxunub: "Rəhbərlik bizə inanır və hər oyunda qələbə gözləyir. İnanıram ki, məqsədimiz olan dünya çempionatına vəsiqə qazanacağıq".

Qeyd edək ki, Azərbaycan yığmasının qrupdakı digər rəqibi Latviya seçməsidir.

Mənbə: GettoSport