Poqba ilə Mourinyo arasındakı münaqişənin səbəbini Herrera açıqladı

17 oktyabr 2026 — Ander Herrera bildirib ki, Pol Poqba ilə Joze Mourinyo arasındakı münaqişənin bir səbəbi Poqbanın sosial şəbəkə paylaşımının internet bağlantısı üzündən gec yayılması olub. Herrera bu açıqlamanı Rio Ferdinand Presents YouTube kanalına müsahibəsində verib.

Sabiq Mançester Yunayted yarımmüdafiəçisi münasibətlərin kəskinləşməsinə həm xarakter fərqləri, həm də Poqbanın transfer qiyməti ilə Mourinyonun gözləntilərinin təsir etdiyini bildirib: “Bilmirəm, bu, xarakterlərin toqquşması idi, yoxsa Poqbanın transfer qiyməti və Mourinyonun gözləntiləri ilə bağlı məsələ. Ola bilsin, Joze Pola qarşı kifayət qədər səbirli deyildi.”

Herrera xatırladıb ki, gərginlik xüsusilə bir oyundan sonra pik həddə çatmışdı. Mourinyo komandanın hesabda geri olduğu zamanda Poqbanın paylaşım etdiyini düşünmüş, lakin ertəsi gün Poqba izah etmişdi ki, paylaşımı matçdan əvvəl edib. İnternet bağlantısının zəifliyi üzündən paylaşım yalnız 30–40 dəqiqə sonra yayımlanmışdı.

İspaniyalı futbolçu bu hadisəni adi anlaşılmazlıq kimi qiymətləndirib, amma əlavə edib ki, o vaxt münasibətləri düzəltmək üçün artıq gec imiş: “Bu, sadəcə, anlaşılmazlıq idi. Amma düşünürəm ki, həmin vaxt münasibətləri düzəltmək üçün artıq çox gec idi.”

Herrera-nın sözləri Poqba ilə Mourinyo arasındakı münasibətin niyə pozulduğuna dair yeni detal təqdim edir və həmin dönəmdə komanda daxilindəki problemlərin kompleks xarakterini vurğulayır.

Mənbə: GettoSport